المرأة الشبكة و الرجل الصندوق

المرأة الشبكة و الرجل الصندوق


قبل الجواز " بتحبني يا احمد ؟ " .. وهو " طبعا بحبك يا منى "


وبعد الجواز و هو بيقرا الجورنال هي " لسه بتحبني يا احمد ؟ " وهو " إنتي مش شايفاني مشغول ... خشي نامي " !!

ما تزعليش يا منى ... احمد لسه بيحبك ... و على فكرة ده مش كلامنا ، ده كلام كاتب أمريكي اسمه " مارك جونجور " قدر يخرج بدراسة مهمة جداً اذهلت كل المتزوجين .. الراجل ده اكتشف ان عقل الرجل عبارة عن مجموعة صناديق و عقل الست عبارة عن شبكة ... !!


دماغ الرجل عبارة عن صناديق مقفولة كويس جداً و مترتبة بدقة جنب بعض أو فوق بعض .. يعني هتلاقي عنده صندوق البيت و صندوق الشغل و صندوق العيال و صندوق القهوة ..وطبعا أهم صندوق بتاع الكورة ! .
أما الست فدماغها عبارة عن نقط شبكية جزء منها متصل و جزء منها منفصل .. عامل بالظبط زي صفحة على الإنترنت مليانة بروابط تدخل على صفحات تانية غير محدودة العدد، و ده يفسر الست ليه بتقوم بأكثر من حاجة في وقت واحد يعني تتكلم في التليفون و هي بتطبخ و بتتفرج على المسلسل و تسكت العيال اللي بيصوتوا جنبها ...
أما الرجل مبيفتحش الصندوق الا لما يحتاج منه حاجة و الدراسة اكتشفت ان الرجل عندما يفتح صندوقاً مابيحبش يفتح صندوقاً ثانياً في نفس الوقت .. يعني لما يكون بيتفرج على الماتش مش هيهتم خاااااالص بالأكل اللي هيتحرق على النار ،أو بنتيجة أبنه في الأمتحان ، و لما حضرتك تقولي له " بتحبني يا أحمد" و هو بيقرا الجورنال هيكون خبر رجوع سمير زاهر لاتحاد الكورة اهم بكثير من السؤال ده لأنه في صندوق القراءة و صعب جدا ينقل لصندوق المشاعر !!


و الأخ " مــــــــارك " بينصح أي ست بإنها ماتقولش لزوجها معلومة مهمة أو تطلب منه حاجة ضرورية و هو في صندوق " اللآ شيئ " ... و دي حالة كدة ربنا ما يحكم على ست بيها عبارة عن الغوص في التفكير في اللا شيء ، يعني يبقى قاعد مش بيفكر و مش عاوز يفكر في حاجة ، ودي هتلاحظيها لما تكوني قلتي له على حاجة و لما تيجي تسأليه عنها يقولك " و الله ما قولتي لي " .. و طبعا و لا هو كداب و لا انت كدابة هو ساعتها بيكون في صندوق " اللا شيء " !!
و يؤكد " مارك " ان الرجل لو نسي يحضر شيئاً كان سبق ووعد به هو فعلا يكون ناسياً لأنه في حالة صندوق اللا شيء .. و ممكن تكون تاهت بين صناديقه الكثيرة ... !!
و في النهاية " مارك " يؤكد أن الخلاف بين الرجل والمرأة خلاف فى أصل الخلقة ، خلاف لا يمكن علاجه ، لكن ممكن التعامل معه بعد أن يفهم كل طرف خصائص الطرف الآخر ، ودوافعه لسلوكه التي تبدو غريبة وغير مبررة في كثير من الأوقات

شكرا على المرور الرائع